د کرنې، اوبو لګولو او مالدارۍ وزیر روسیې ته سفر وکړ

افغان غږ خبری آژانس - کابل: د کرنې، اوبو لګولو او مالدارۍ وزارت مطبوعاتي دفتر نن (پنجشنبه، د قوس ۶مه) یوه مطبوعاتي اعلامیه خپره کړه چې پکې ویل شوي چې د افغانستان د کرنې او مالدارۍ خونې مشر خان محمد فروتن او د کرنې وزارت سلاکار محمد ولي وزیري به په دې سفر کې له وزیر سره ملګري وي.

ټاکل شوې ده چې د امارت د کرنې، اوبو لګولو او مالدارۍ وزیر په مسکو کې د څارویو د روغتیا په نړیوال کنفرانس کې ګډون وکړي او د څارویو د ناروغیو د مخنیوي او کنټرول، تخنیکي ظرفیت لوړولو او د ګډون کوونکو هیوادونو له استازو سره د ګډې همکارۍ پراختیا پورې اړوند مسلو په اړه بحث او نظرونه تبادله کړي.

د کرنې، اوبو لګولو او مالدارۍ وزارت په دې نړیواله غونډه کې ګډون د څارویو د روغتیا په سکتور کې د پراختیایي پروګرامونو د پرمختګ، نوي ټیکنالوژیو ته د لاسرسي او د افغانستان او نورو هیوادونو ترمنځ د تخنیکي اړیکو د پیاوړتیا لپاره یو ارزښتناک فرصت ګڼي.

همدارنګه پلان شوې ده چې د دې غونډې په څنډه کې د کرنې وزارت د پلاوي او د ګډون کوونکو هیوادونو د یو شمیر چارواکو ترمنځ ځینې دوه اړخیزې غونډې هم ترسره شي.