د هانګ کانګ د اور لګېدو له امله د مړو شمېر ۹۴ ته ورسېد

افغان غږ خبری آژانس: د هانګ کانګ د اور وژنې څانګې د جمعې په ورځ اعلان وکړ چې د استوګنې په کمپلیکس کې د سوځېدلو پوړونو د لټون له ساعتونو ساعتونو وروسته، د مړو شمېر ۹۴ ته ورسېد. تر اوسه پورې، له ۷۰ څخه زیات کسان - چې ۱۱ اور وژونکي هم پکې شامل دي - ټپیان شوي او شاوخوا ۹۰۰ کسان له سیمې ایستل شوي دي.

 

د اسوشیټیډ پریس په وینا، د اور وژنې څانګې مرستیال کمشنر ډیریک آرمسټرانګ چان اعلان وکړ چې د اور وژنې عملیات وروستي پړاوونو ته رسېدلي او د ژغورنې کارکوونکي د ملبې لرې کولو او د اور د بیا لګېدو د مخنیوي لپاره کار کوي.

 

سره له دې چې د پیښې راهیسې له ۲۴ ساعتونو څخه زیات وخت تیر شوی، دا لا هم روښانه نه ده چې د اور لګېدو پر مهال څومره خلک په ودانۍ کې وو. د هانګ کانګ اجرایوي رییس مخکې ویلي وو چې ۲۷۹ کسان له اړیکو څخه پرې شوي او هیڅ نوي ارقام نه دي خپاره شوي.

 

په عین حال کې، د هانګ کانګ پولیسو د یوې ساختماني شرکت څو مدیران او ساختماني مشاورین نیولي دي چې په دې کمپلیکس کې ښکیل دي، او شک لري چې د ودانۍ په مخ کې کارول شوي ځینې توکي د مقاومت اړین معیارونه نه پوره کوي او د اور د چټک خپریدو لامل شوي دي.

 

پولیسو وویل چې د پریسټیج انجینرۍ اسناد، چې د کمپلیکس د ساتنې مسؤلیت یې درلود، د نورو څیړنو لپاره ضبط شوي او د احتمالي تخنیکي نیمګړتیاوو په اړه تحقیقات روان دي.

 

د هانګ کانګ په یوه ترټولو ګڼ میشته استوګنیز کمپلیکس کې اور د چهارشنبې په شپه پیل شو او په څو دقیقو کې یې د ودانۍ منځنۍ او پورتنۍ پوړونه ونیول.

 

په پیښه کې د قربانیانو لوړ شمیر یو ځل بیا په هانګ کانګ کې د ساختماني څارنې د ترسره کولو په لاره نیوکې زیاتې کړې دي. کارپوهان وايي چې ډیر لوړ کثافت، د خوندیتوب ضعیف تجهیزات او د بې کیفیته موادو کارول په ښاري سیمو کې د داسې ناورینونو د بیا راګرځیدو لاملونه دي.