افغان غږ خبری آژانس - کابل: د پوهنې وزارت مطبوعاتي دفتر نن (شنبه، د قوس ۸مه) په یوه مطبوعاتي اعلامیه کې اعلان وکړ چې د فاریاب ولایت د خواجه موسی ولسوالۍ د "یکاتپا" لومړني ښوونځي نوې ودانۍ د سیمه ییزو پوهنې چارواکو په ګډون د یو لړ مراسمو په ترڅ کې په رسمي ډول پرانیستل شوه.
دا ښه سمبال ودانۍ ۸ درسي خونې، اداري خونې، لابراتوار، د ساتونکو خونه، د بریښنا سیسټم، د محافظتي احاطې دیوال او د څښاک پاکو اوبو اسانتیاوې لري، چې د ۱۴.۳۶ میلیون افغانیو په ټولیز لګښت او د یوې همکارې ادارې په مالي ملاتړ سره د ګټې اخیستنې مرحلې ته رسیدلې ده.
د فاریاب ولایت د پوهنې چارواکو ټینګار وکړ چې د دې ودانۍ په پرانیستلو سره، د تعلیمي ځای په برخه کې د زده کونکو جدي ستونزې حل شوې او اوس د سیمې زده کونکو ته د زده کړې لپاره خوندي، معیاري او مجهز چاپیریال چمتو شوی دی.