د غور ولایت په څلورو ولسوالیو کې د ۵۴ کیلومتره کلیوالي سړکونو جوړول او بیارغونه پیل شوې ده

افغان غږ خبری آژانس - کابل: د کلیو د بیارغونې او پراختیا وزارت مطبوعاتي دفتر نن، یکشنبه (قوس ۹) په یوه مطبوعاتي اعلامیه کې اعلان وکړ چې د غور ولایت په دولینا، تیواره، شهرک او چارسده ولسوالیو کې د ۵۴ کیلومتره کلیوالي سړکونو جوړول او بیارغونه پیل شوې ده.

د کلیو د بیارغونې او پراختیا وزارت د مخابراتو د څانګې مشر مولوي شرف الدین په دې اړه وویل:

"دا پروژې به نه یوازې روغتیا، تعلیم او بازار خدماتو ته د خلکو لاسرسی اسانه کړي، بلکې د پلي کیدو په جریان کې به د سلګونو ځایی اوسیدونکو لپاره لنډمهاله کاري فرصتونه هم برابر کړي."

هغه زیاته کړه: "د دې سړکونو په بشپړیدو سره به د پورته ذکر شویو ولسوالیو د خلکو د ترانسپورت ستونزې د پام وړ کمې شي او مرکزي بازارونو ته د کرنیزو او څارویو محصولاتو لیږد به اسانه شي."

د کلیو د بیارغونې او پراختیا وزارت د دې پروژو د دقیق لګښت په اړه جزئیات ورنکړل، خو ټینګار یې وکړ چې دا اقدامات د هیواد په کچه د کلیوالي سړکونو د پراختیا لپاره د یو جامع ملي پروګرام برخه ده. ورته پروژې لا دمخه په نورو ولایتونو کې پیل شوي او پلي شوي دي.

غور ولایت د غرنیو سیمو او د معیاري سړکونو د نشتوالي له امله د ترانسپورتي زیربناوو له پلوه یو له محرومو ولایتونو څخه ګڼل کیږي.