ترکي پانګوالو په هیواد کې د سړک او پلونو په جوړولو کې پانګونې ته لیوالتیا ښودلې

افغان غږ خبری آژانس - کابل: د ټولګټو وزارت مطبوعاتي دفتر نن اعلان وکړ چې د وزارت وزیر ملا محمد عیسی ثاني د ترکي ساختماني شرکتونو له استازي بولنت بلګي سره ولیدل او خبرې یې وکړې.

 

په دې غونډه کې، د ترکي شرکتونو استازي د سړک او پلونو په جوړولو کې د پانګونې لپاره د جدي لیوالتیا ډاډ ورکړ.

 

په ورته وخت کې، د ټولګټو وزیر وویل: "په هیواد کې امنیت تر بل هر وخت ډیر ډاډمن شوی، او په بیلابیلو سکتورونو، په ځانګړي ډول سړکونو کې د کورنیو او بهرنیو پانګوالو لپاره د پانګونې فرصتونه شتون لري."

 

د یادونې وړ ده چې د ملي امنیت په برابرولو او د اسلامي امارت لخوا د غوره اسانتیاوو په رامینځته کولو سره، په هیواد کې د پانګونې لپاره د بهرنیو پانګوالو لیوالتیا زیاته شوې ده.

 

د وروستیو راپورونو له مخې، ترکیې له ۲۰۰۲ کال راهیسې په هیواد کې د سړکونو او پلونو په ګډون له ۷۰۰ څخه زیاتې ساختماني پروژې بشپړې کړې دي او د ساختماني سکتور کې د بهرنۍ پانګونې په برخه کې لومړی مقام لري. په ۲۰۲۴ کال کې، ترکي پانګوالو د سړکونو او صنعتي پارکونو په څیر زیربنایي پروژو کې هم خپله علاقه څرګنده کړې ده.