د اولمپیک ملي کمیټه د غیږ نیونې او وزن پورته کولو لوبغاړو ته درناوی کوي

افغان غږ خبری آژانس - کابل: د اولمپیک، فزیکي زده کړې او سپورت عمومي ریاست مطبوعاتي دفتر نن (دوشنبه، د قوس ۱۰مه) یوه مطبوعاتي اعلامیه خپره کړه چې پکې ویل شوي چې د اولمپیک، فزیکي زده کړې او سپورت عمومي ریاست د ملي غیږ نیونې او وزن پورته کولو لوبغاړو ته چې په نړیوالو سیالیو کې د ګډون او د برونزو مډالونو او دریم مقام ګټلو وروسته هیواد ته راستانه شوي د یو ځانګړي مراسمو په ترڅ کې درناوی او هڅونه وکړه.

د مطبوعاتي اعلامیې له مخې، د هیواد د رستمي غیږ نیونې ټیم لوبغاړي، چې د رسمي پلاوي سره د روان کال د نومبر له ۲۶ څخه تر ۲۹ پورې د متحده عربي اماراتو لخوا کوربه توب شویو نړیوالو سیالیو کې برخه اخیستې وه، وکولای شول چې د افغانستان لپاره د برونزو دوه ارزښتناک مډالونه ثبت کړي.

په خبرپاڼه کې زیاته شوې ده چې د هېواد د وزن پورته کولو څلور کسیزه لوبډله، چې د روان کال د نومبر له ۲۶مې څخه تر ۲۹مې پورې د ایران په تهران کې د دې ډسپلین په نړیوالو سیالیو کې د فضل کریم ترکمان په وړتیا سره برخه اخیستې وه، وتوانېده چې درې د برونزو مډالونه وګټي او په سیالیو کې دریم مقام ترلاسه کړي.