د شیرخان بندر له لارې د توکو صادرات زیات شوي

افغان غږ خبری آژانس - مزار شریف: د کندز د سوداګرۍ خونې د چارواکو په وینا، تیر کال ۱۴۷۲ لاریو د بندر له لارې توکي صادر کړي، پداسې حال کې چې د روان کال له پیل راهیسې ۳۵۵۰ لاریو بهر ته توکي صادر کړي دي.

 

د کندز د سوداګرۍ خونې د صادراتو پراختیا او پانګونې رییس مسعود وحدت وویل چې ډیری صادرات سبزیجات، ممیز، کچالو، میوې او نور محصولات دي چې تاجکستان، چین، روسیې او قرغزستان ته لیږل شوي دي. 

هغه زیاته کړه چې دغو هیوادونو له پاکستان سره د سوداګرۍ له ځنډولو وروسته له افغانستان سره د سوداګرۍ همکارۍ لپاره ښه شرایط برابر کړي دي.

 

همدارنګه، د شیرخان بندر سوداګرو د رامنځته شویو اسانتیاوو څخه رضایت څرګند کړ او ویې ویل چې کله د دوی توکي ګمرک ته ورسیږي، نو دوی ته به اجازه ورکړل شي چې پرته له کومې ستونزې صادر شي.

 

خو د کندوز ولایت ویاند حاجي بیت الله وویل چې د اسلامي امارت چارواکي شپه او ورځ کار کوي ترڅو د خلکو په ځانګړې توګه د سوداګرو ستونزې حل کړي او هغوی ته غوره اسانتیاوې برابرې کړي.