د سره صلیب نړیواله کمیټه: تېر کال په افغانستان کې د ماینونو په چاودنو کې ۹۲ کسان ووژل شول

افغان غږ خبری آژانس: د سره صلیب نړیوالې کمیټې په یوه راپور کې اعلان وکړ چې په ۲۰۲۵ کال کې په افغانستان کې د ماینونو او چاودېدونکو توکو د چاودنو له امله لږ تر لږه ۹۲ کسان مړه شوي او ۳۷۵ نور ټپیان شوي دي.

دې سازمان نن د ماینونو د پوهاوي او د چاودېدونکو توکو د شنډولو په عملیاتو کې د مرستې د نړیوالې ورځې په مناسبت اعلان وکړ چې د دې چاودنو ۶۶ سلنه قربانیان ماشومان وو.

د راپور له مخې، تېر کال په ټول هېواد کې لږترلږه ۲۱۷ د مهماتو چاودنې ثبت شوې، چې د جګړې څخه پاتې ماینونو او چاودېدونکو توکو د جدي ګواښ څرګندونه کوي.

د سره صلیب نړیوالې کمېټې ټینګار وکړ چې افغانستان لا هم په نړۍ کې یو له هغو هېوادونو څخه دی چې په چاودېدونکو توکو ککړ دي، او دا ګواښ لاهم ملکي وګړي، په ځانګړې توګه ماشومان په نښه کوي.

راپور کې ویل شوي چې د دې پیښو شاوخوا دریمه برخه په ختیځ افغانستان کې رامنځته شوې، چې لویدیځ او سویلي سیمې هم د دې چاودنو د پام وړ برخه تجربه کوي، پداسې حال کې چې شمالي ولایتونو د دې ډول پیښو ترټولو ټیټ شمیر ثبت کړی دی.

سازمان د ماینونو د تلفاتو وضعیت د اندیښنې وړ وباله، او زیاته یې کړه چې د هر وژل شوي کس لپاره، نږدې څلور نور ټپیان کیږي، چې ډیری یې دایمي معلولیت او اوږدمهاله پاملرنې ته اړتیا لري.

سره صلیب دا هم وویل چې تیر کال یې په ککړو سیمو کې له ۱۲۰،۰۰۰ څخه زیاتو خلکو ته د ماینونو او چاودېدونکو توکو د خطر په اړه د پوهاوي روزنه ورکړې ده.

په ورته وخت کې، په افغانستان کې د بشري حقونو لپاره د ملګرو ملتونو ځانګړی راپور ورکوونکی، ریچارډ بینټ، له نړیوالې ټولنې څخه وغوښتل چې د ماینونو او ناچاودو توکو د پاکولو لپاره په دوامداره عملیاتو کې ډیره پانګونه وکړي.