د صنعت وزیر: له قرغزستان سره به اقتصادي اړیکې یو ملیارد ډالرو ته ورسیږي

افغان غږ خبری آژانس - کابل: د صنعت او سوداګرۍ وزارت مطبوعاتي دفتر نن (دوشنبه، د حمل ۱۷مه) یوه مطبوعاتي اعلامیه خپره کړه چې پکې ویل شوي چې د دې وزارت وزیر نورالدین عزیزي د قرغزستان جمهوریت د بهرنیو چارو مرستیال وزیر تورسنکلوف او په کابل کې د قرغزستان سفیر توردکون صدیقوف سره ولیدل او خبرې اترې یې وکړې.

په دې غونډه کې، وزیر عزیزي د افغانستان - مرکزي آسیا مشورتي غونډه کې د قرغزستان پلاوي د ګډون ستاینه وکړه او د دواړو هیوادونو ترمنځ د سوداګرۍ او اقتصادي اړیکو په پراختیا او پیاوړتیا یې ټینګار وکړ. ښاغلي تورسنکلوف هم افغانستان او قرغزستان دوه وروڼه هیوادونه وبلل او د دواړو هیوادونو ترمنځ یې په ډیرو کلتوري مشترکاتو ټینګار وکړ.

دواړو خواوو په وروستیو کلونو کې د دوه اړخیزې سوداګرۍ د ودې څخه رضایت څرګند کړ او د سوداګریزو تبادلو حجم یو ملیارد ډالرو ته د لوړولو اړتیا باندې یې ټینګار وکړ. وزیر عزیزي همدارنګه وړاندیز وکړ چې د قرغزستان په ساختماني پروژو کې د لویو ساختماني شرکتونو او افغان بشري سرچینو ظرفیت وکارول شي.

دا غونډه د دواړو هیوادونو د اقتصادي اړیکو د پیاوړتیا او دوه اړخیزې همکارۍ د پراخولو هوډ څرګندوي.