چین: کابل او اسلام آباد د تاوتریخوالي کمولو موافقه وکړه

افغان غږ خبری آژانس - کابل: د چین د بهرنیو چارو وزارت اعلان وکړ چې افغانستان او پاکستان په سرحدي سیمو کې د تاوتریخوالي د چټک کمولو او دوه اړخیزو اړیکو د ښه کولو په اړه د وروستیو خبرو اترو په جریان کې یوې ابتدايي موافقې ته رسیدلي دي.
د چین د بهرنیو چارو وزارت د یوې اعلامیې له مخې، دا موافقه د امنیتي بحرانونو د کنټرول او د دواړو خواوو ترمنځ د خبرو اترو د پروسې د پیاوړتیا لپاره د بیجینګ د ډیپلوماټیکو هڅو په چوکاټ کې شوې ده.
په اعلامیه کې ویل شوي چې چین په وروستیو اونیو کې د ډیپلوماټیکو او امنیتي چینلونو له لارې له افغان او پاکستاني خواوو سره په تماس کې دی او د دې خبرو اترو لپاره یې زمینه برابره کړې ده.
سیمه ییزو سرچینو هم راپور ورکړی چې دا موافقه د اورومچي په ښار کې د څو پړاونو ژورو خبرو اترو وروسته وشوه، چې تمرکز یې د سرحدي تاوتریخوالي اداره کول، د شخړو د زیاتوالي مخنیوی او د دواړو خواوو ترمنځ د اړیکو میکانیزمونه رامینځته کول دي.