په فاریاب کې له ۵۶۰۰ څخه زیاتو کورنیو ته نغدي مرستې وویشل شوې

افغان غږ خبری آژانس - کابل: د طبیعي پیښو سره د چمتووالي ملي ادارې مطبوعاتي دفتر نن (شنبه، د ثور ۱۲مه) یوه مطبوعاتي اعلامیه خپره کړه چې پکې ویل شوي چې د دې ادارې او هنګر دفتر ترمنځ د لاسلیک شوي تفاهم لیک پر بنسټ، دا مرسته د سروې ترسره کولو وروسته او په دوهم پړاو کې د فاریاب ولایت په مرکز کې اړمنو کورنیو ته ویشل شوې ده.

چارواکو وویل چې په دې پروسه کې، هرې کورنۍ ته ۲۹۰۰ افغانۍ ځانګړې شوې وې، او په ټولیزه توګه ۱۶۴۴۵۹۰۰ افغانۍ د دې پروګرام لپاره ځانګړې شوې وې.

دا پروسه د سیمه ییزو چارواکو په شتون کې ترسره شوه او هدف یې د زیان منونکو کورنیو ملاتړ او د دوی د اقتصادي ستونزو کمول وو.

په پای کې، ګټه اخیستونکو کورنیو د دې اقدام څخه مننه څرګنده کړه او په راتلونکي کې یې د داسې مرستو د دوام غوښتنه وکړه.

د یادونې وړ ده چې په دې وروستیو میاشتو کې، د هیواد په بیلابیلو ولایتونو کې اړمنو کورنیو ته د نغدي او غیر نغدي مرستو د ویشلو پروسه زیاته شوې ده، په ځانګړې توګه د کورنیو او نړیوالو ادارو په همکارۍ.