تمه ده چې د افغانستان او پاکستان لپاره د امریکا ځانګړی استازی نن کابل ته راشي.
مارک ګروسمن به د دې سفر په ترڅ کې له افغان چارواکو سره وویني او له هغوي سره به په افغانستان کې د سولې پر هلو ځلو وغږیږي.
په کابل کې حکومتي چارواکي له طالبانو سره د امریکا د خبرو په اړه وضاحت غواړي.
رپوټونه څرګندوي، چې له نژدې لسو میاشتو راهیسې امریکایي مسوولانو له طالبانو سره د سولې خبرې پیل کړې دي.
ګروسمن د دې سفر په ترڅ کې چې لږ تر لږه به یوه اونۍ دوام وکړي د قطر په ګډون د سیمې یو شمیر نورو هیوادونو ته هم سفر کوی.
په قطر کې د طالبانو لپاره سیاسيۍ دفتر پرانیستل شوی دی.
سرچينه : افغان غږ آژانس(آوا)