افغان غږ خبری آژانس - کابل: د لوی اختر په مناسبت په خپاره شوي پیغام کې، یوناما لوی اختر د خلکو د نږدې کولو او د انساني او مذهبي ارزښتونو د پیاوړتیا لپاره یو مهم فرصت ګڼلی، او ټینګار یې کړی چې دا مبارکې ورځې کولی شي د افغان اتباعو ترمنځ د خواخوږۍ، همکارۍ او تفاهم د زیاتوالي لپاره لاره هواره کړي.
نړیوال سازمان هم هیله څرګنده کړه چې د لوی اختر روح کولی شي د سولې، عدالت او مهربانۍ د ساتنې لپاره د خلکو او مختلفو ادارو ګډې ژمنې پیاوړې کړي، او د افغانستان لپاره د روښانه او باثباته راتلونکي په جوړولو کې اغیزمن رول ولوبوي.