په سرپل کې په مظاهرو کې نن یو تن وژل شوی

په سرپل ولایت کې په مظاهرو کې نن یو تن وژل شوی او درې تنه نور ټپیان شوي دي.

له سیمې نه د ازادي راډیو خبریال خبر راکوي، چې د سرپل د والي سید انور رحمتي ساتونکو پر مظاهره کوونکو ډزې کړي، چې له امله یې یو تن وژل شوی او درې نور ټپیان شوی.

د سرپل ولایت سیمه ایزو مسوولانو لا تر اوسه په دې اړه د جزییاتو له ورکولو څخه ډډه کړې.

دا مظاهرې د سرپل ولایت سلګونو اوسیدونکو نن ځکه وکړې، چې د دوې په خبره د سرپل والي بې کفایته دی او خپل مسوولیتونه سم نه ترسره کوي.