په جلال آباد ښار کې د دوهم نظر آباد پل د جوړولو کار د ۱۹.۶ میلیون افغانیو په لګښت پیل شو

افغان غږ خبری آژانس - کابل: د ننګرهار ولایت د جلال آباد ښار په اوومه ناحیه کې د دوهم نظر آباد پل د جوړولو کار د ټولګټو وزارت لخوا پیل شوی دی.

 

د ننګرهار ولایت د ټولګټو چارو رییس مولوي احمد احمدي د پروژې د پرانیستې په مراسمو کې وویل چې دا پل به د ټولګټو وزارت له بودیجې څخه د ۱۹.۶ ملیون افغانیو په لګښت جوړ شي.

 

د هغه په ​​وینا، د دوهم نظر آباد پل به ۲۸ متره اوږد او ۱۱ متره پلن وي، او د جوړولو کار به یې په لسو میاشتو کې بشپړ شي.

 

هغه زیاته کړه چې د پل د پیاوړتیا او د سیلابونو د زیانونو د مخنیوي لپاره به په دواړو خواوو کې د ۳۵ او ۲۵ مترو په اوږدوالي استنادي دیوالونه هم جوړ شي.

 

د ننګرهار د فواید عامې رئیس ټینګار وکړ چې د دې پروژې په بشپړیدو سره به په سیمه کې د ترافیکو ګڼه ګوڼه کمه شي او د سیلابونو پرمهال به د سړکونو احتمالي بندښت او زیانونه مخنیوی وشي.

 

د سیمه ییزو راپورونو له مخې، د نظرآباد لومړی پل په تیرو کلونو کې جوړ شوی و، خو د نفوس او موټرو د زیاتوالي سره، د ترافیکو بار کمولو لپاره د دوهم پل جوړولو اړتیا احساس شوه. کارپوهانو د دې پروژې د پیل هرکلی وکړ او دا یې "د ښاري زیربناوو د ښه والي او د ښاریانو د تګ راتګ د اسانتیا لپاره یو اغیزمن ګام" وباله.

 

د یادونې وړ ده چې د جلال آباد ښار تل د خپل ستراتیژیک موقعیت او تورخم پولې ته د نږدېوالي له امله له درنو ترافیکو سره مخ وي، او د دې پل جوړول کولی شي په دې سیمه کې د ترافیکو په اسانه کولو کې مرسته وکړي.