په کابل کې د زړه ځانګړی روغتون پرانیستل شو چې د ۲۰۰۰ ناروغانو کلنۍ درملنې ظرفیت لري / د ماشومانو لپاره ۲۴ ساعته وړیا خدمتونه

افغان غږ خبری آژانس - کابل: د سرې میاشتې ټولنې عمومي رییس شهاب الدین دلاور د روغتون د پرانیستې په مراسمو کې وویل چې تر اوسه پورې د زړه د ناروغیو شاوخوا ۱۵۰۰۰ ماشومان د سازمان په لګښت په کورنیو روغتونونو کې درملنه شوي دي. د دې تخصصي مرکز په پرانیستلو سره، د درملنې د بار یوه مهمه برخه به د اړمنو کورنیو له اوږو څخه لیرې شي.

د دې ادارې مرستیال حافظ عزیز الرحمن هم په مراسمو کې وویل چې نوی روغتون د نړیوالو معیارونو سره سم سمبال دی او په هیواد کې د زړه د پاملرنې خدماتو پیاوړتیا او د تخصصي درملنې مخ په زیاتیدونکي غوښتنې پوره کولو لپاره ډیزاین شوی. روغتون دوه عملیاتي خونې لري چې د عصري ټیکنالوژۍ سره سمبال دي ترڅو د زړه ځانګړي جراحي ترسره کړي.

پخوا، د زړه ناروغۍ لرونکي ډیری ماشومان د درملنې لپاره جرمني، هند او نورو هیوادونو ته لیږل کیدل، چې د کورنیو لپاره یې دروند لګښت درلود. د سرې میاشتې چارواکو هیله څرګنده کړې چې د دې مرکز په کارولو سره به د ناروغانو بهر ته لیږلو اړتیا د پام وړ کمه شي.