د اسلامي امارت چارواکي مرستندویه ادارو ته خبرداری ورکوي: د ۸ میلیون څخه زیاتو کډوالو د راستنیدو مسؤلیت په غاړه واخلئ

افغان غږ خبری آژانس - کابل: د اسلامي امارت مرستیال لومړي وزیر مولوي عبدالسلام حنفي د پنجشنبې په ورځ د سره صلیب د نړیوالې کمېټې د عملیاتو له مشرې میرمن یاسمین پیریز او په افغانستان کې د دې کمېټې له مشرې جوهانس بروور سره وکتل او خبرې یې وکړې.

د دې غونډې په جریان کې، د سره صلیب د نړیوالې کمېټې د عملیاتو مشر د اسلامي امارت د دې ادارې سره د همکارۍ ستاینه وکړه او ویې ویل چې له نېکه مرغه، د اوږدې جګړې وروسته، په افغانستان کې وضعیت اوس ارام دی؛ خو له بده مرغه، د جګړې اغېزې لا هم احساس کېږي او بشري مرستو ته اړتیا شته. هغه ټینګار وکړ چې د سره صلیب نړیواله کمېټه به د افغانستان خلکو ته مرستې ته دوام ورکړي.

آغلې یاسمین پریز په افغانستان کې د کمیټې د شتون د ۴۰ کلن تاریخ یادونه هم وکړه او ویې ویل چې په دې موده کې بندیانو ته بشري مرستې ورکړل شوې دي او دا اداره ژمنه ده چې په راتلونکي کې هم دا ډول مرستې دوام ورکړي.

په دې غونډه کې، مولوي عبدالسلام حنفي هم د سره صلیب نړیوالې کمېټې د افغاني سرې میاشتې ټولنې او د دې هیواد له خلکو سره د همکارۍ ستاینه وکړه او ویې ویل: "په تیرو پنځو کلونو کې، له ۸ میلیون څخه ډیر افغانان له ګاونډیو هیوادونو څخه افغانستان ته راستانه شوي دي؛ له همدې امله، د مرستندویه سازمانونو لپاره اړینه ده چې په دې برخه کې خپل مسؤلیت ترسره کړي."

هغه همدارنګه ټینګار وکړ چې اسلامي امارت د بندیانو د اسلامي او بشري حقونو د ډاډمنولو سربیره، د دوی د نورو اړتیاوو د پوره کولو لپاره هم ژمن دی.