د افغانستان د صنعت او سوداګرۍ مرستیال وزیر د ازبکستان سوداګریز نندارتون ته بلل شوی

افغان غږ خبری آژانس - کابل: د صنعت او سوداګرۍ مرستیال وزیر مولوي احمدالله زاهد د ازبکستان د قشقدریا ولایت د مرستیال والي شهرت مرادوف سره ولیدل او د افغانستان او ازبکستان ترمنځ د اقتصادي همکارۍ د پراختیا په لارو چارو یې بحث وکړ.

 

د صنعت او سوداګرۍ وزارت مطبوعاتي دفتر په یوه بیان کې ویلي چې دواړو خواوو د قشقدریا ولایت او افغانستان ترمنځ د مستقیمې اقتصادي همکارۍ د رامینځته کولو، د دواړو خواوو د اقتصادي فعالانو ترمنځ د اړیکو د پراختیا او د پنبې په سکتور کې د ګډې پانګونې په اړه بحث وکړ.

 

په دې غونډه کې د تجربو تبادلې او د سوداګرۍ همکارۍ د پراختیا لپاره د ازبکستان د اقتصادي ظرفیت کارولو باندې هم ټینګار وشو.

 

په عین حال کې، د قشقادریا مرستیال والي مولوي احمدالله زاهد ته بلنه ورکړې چې د ازبکستان په نړیوال نندارتون او سوداګریزو غونډو کې ګډون وکړي، چې ټاکل شوې ده سږ کال په اکتوبر کې ترسره شي.

 

چارواکي وايي چې د داسې غونډو جوړول کولی شي د افغانستان او ازبکستان ترمنځ د اقتصادي تعامل، ګډې پانګونې او سوداګریزو اړیکو د پراختیا لپاره اساس برابر کړي.

 

په وروستیو کلونو کې، افغانستان او ازبکستان د اقتصادي او سوداګریزو اړیکو پراخولو او د دواړو هیوادونو د خصوصي سکتور ترمنځ د تعاملاتو په زیاتولو ټینګار کړی دی. د قشقادریا ولایت هم کولی شي د کرنې او صنعتي ظرفیتونو له امله له افغانستان سره همکاري او ګډه پانګونه چمتو کړي، په ځانګړې توګه د پنبې په سکتور کې.

 

د ازبکستان په نړیوال نندارتون او سوداګریزو غونډو کې د ګډون لپاره د افغانستان د صنعت او سوداګرۍ وزارت چارواکي ته بلنه ورکول کولی شي د افغانستان اقتصادي وړتیا معرفي کړي او د دواړو خواوو سوداګرو او پانګوالو ترمنځ مستقیمې اړیکې رامینځته کړي.