د عامې روغتیا وزارت د یوې ادارې سره د ۱،۲۲،۵۰۵ ډالرو په ارزښت د تفاهم لیک لاسلیک اعلان کړی او ویلي یې دي چې د دې تفاهم لیک پر بنسټ به د هیواد په ۱۴ ولایتونو کې له ۱۱۱،۰۰۰ څخه ډیر خلک د روغتیا او رواني ټولنیزو خدماتو څخه ګټه پورته کړي.
دخپریدو نیټه :يکشنبه ۸ سنبله ۱۴۰۵ ساعت ۱۶:۰۲
د مطلب کود : 364229
افغان غږ خبری آژانس - کابل: د عامې روغتیا وزارت مطبوعاتي دفتر په یوه مطبوعاتي اعلامیه کې اعلان کړی چې دوی د روغتیا خدماتو وړاندې کولو او مدغم روغتیایی خدماتو ته د میندو او ماشومانو د لاسرسي زیاتولو په هدف له یوې ادارې سره د ۱،۲۲،۵۰۵ ډالرو په ارزښت د تفاهم لیک لاسلیک کړی دی.
د دې تفاهم لیک له مخې، د بدخشان، بادغیس، غزني، هلمند، کابل، لوګر، میدان وردګ، ننګرهار، پکتیا، پنجشیر، سرپل، تخار، ارزګان او زابل ولایتونو ۱۱۱،۸۹۴ اوسیدونکي به د رواني ټولنیزو خدماتو وړاندې کولو په ۳۵ مرکزونو کې له روغتیايي خدماتو څخه ګټه پورته کړي.
د عامې روغتیا وزارت ویلي چې د دې پروګرام د پلي کولو هدف په دې ولایتونو کې د روغتیايي خدماتو پراخول او مدغم روغتیايي خدماتو ته د میندو او ماشومانو لاسرسی زیاتول دي.
همدارنګه، د دې تفاهم لیک د احکامو پر بنسټ، ۲۰۴ کسانو ته به د روغتیا په سکتور کې د کار فرصتونه برابر شي.
دا تفاهم لیک په داسې وخت کې لاسلیک کیږي چې د خلکو روغتیایی خدماتو ته لاسرسی پراخول، په ځانګړې توګه په لرې پرتو سیمو کې او د میندو او ماشومانو لپاره، د هیواد د روغتیايي سیسټم یوه مهمه اړتیا ګڼل کیږي.
avapress.net/vdcb5abf9rhb05p.q3ur.html
ډیری لیدل شوي
