دخپریدو نیټه :سه شنبه ۱۵ اسد ۱۳۹۲ ساعت ۱۲:۲۴
د مطلب کود : 71928
په بګرام کې د بهرنیو بندیانو د ساتنې په اړه د امریکایانو اندېښنه
تاند- په داسي حال کې چې امریکا د افغانستان له جګړې پیڅې راټولوي، د دغه هیواد لپاره په سختو کارونو کې ښايي تر ټولو زیات د بګرام محبس بندول وي چې په دوهمه ګوانتنامو مشهوره شوی دی.
د بګرام د محبس مسوولیت د افغانستان حکومت ته سپارلی شوی خو لا هم په دغه زندان کې ۶۷ بهرني بندیان د امریکایانو له لوري ساتل کېږي. د هغوی په منځ کې د القاعده هغه غړي هم شامل دي چې د ۲۰۰۱ کال د سپټمبر د یوولسمې له حملې وروسته د نړۍ په مختلفو سیم کې نیول شوي خو سره له دې چې د ځینو د نیول کېدو تر یوې لسیزې زیات وخت تېرېږي لا هم په بګرام کې بندیان دي.
د واشنګټن پوسټ ورځپاڼې د راپور له مخې د بګرام د بندولو مسله د اوباما د حکومت لپاره هماغسي پېچلې ده لکه څرنګه چې د ګوانتنامو د توقیف ځای ده. حتي ځیني امریکايی چارواکي وايي چې د بګرام مسله تر ګوانتنامو هم سخته او د لا زیاتې توجه وړ ده.
په افغانستان کې د نړیوالو ځواکونو له عمومي قومندان جنرال جوزیف ډنفرډ څخه په یوه مرکه کې وپوښتل شول چې ایا د بګرام لپاره کوم پلان شته او یا د دغه محبس د بندولو لېوالتیا شته؟ ده وویل چې پلان نشته خو لېوالتیا شته چې هغه بند شي.
د امریکا دفاع وزارت نه دی توانېدلی چې بندیان محاکمه کړي خو دا په داسي حال کې ده چې د دغه زندان د بندیانو شمېر مخ په ډېرېدو دی ځکه چې امریکايی او افغان ځواکونه په ګډو عملیاتو کې اوس لا ډېر بهرنیان نیسي.
امریکايی پوځیان د ۲۰۱۴ کال په پای کې، چې په افغانستان کې یې جنګي ماموریت رسماً پای ته رسېږي، مجبوره دي چې دا محبس بند کړي یا د افغانستان دولت ته وسپاري ځکه چې د افغانستان په خاوره کې دی.
په داسي صورت کې له امریکايي پوځي او ملکي چارواکو سره د دغو بندیانو د امنیتي تدابیرو په اړه اندېښنې موجودې دي.
د دوی په نظر ښه لار دا ده چې دا زندان څو لسیزې نور هم د امریکایانو تر کنټرول لاندې پاتې شي خو په دې مسله کې ستونزه دا ده چې افغانستان به امریکا ته اجازه ورکړي او که ور نه کړي.
د افغانستان او امریکا ترمنځ امنیتي تړون به روښانه کړي چې امریکا په افغانستان کې له ۲۰۱۴ وروسته حضور لرلی شي او کنه.
https://avapress.com/vdcevo8f.jh8zwi6rbj.html
تبصره پوسټ کړئ
ستاسو نوم
ستاسو دبرېښنا ليک پته