د افغانستان د ملي امنیت ریاست مسوولین وایي چې؛ د کونړ لپاره د طالبانو نومول شوی والي له اولسو نورو افغان او پاکستانیو طالب قومندانانو سره ووژل شول.
د ملي امنیت عمومي ریاست نن وویل چې؛ دا کسان تېره شپه په شیګل ولسوالۍ کې په یوې هوايي حملې کې هغه وخت ووژل شول چې؛ یوه غونډه یې جوړه کړې وه.
په اعلامیې کې نه دي ویل شوي چې؛ دا حمله د چا له خوا شوې.
خو تر دې مخکې ځینو سیمه یېزو چارواکو ازادي راډیو ته ویلي وو؛ چې دا کسان د امریکا د بې پیلوټه الوتکې په حملې کې وژل شوي دي.
وسله والو طالبانو تر اوسه په دې اړه څه نه دي ویلي.