خوښ ديک ۰

طالبان دې لومړی د خپل باور ازموینه ورکړي

افغان حکومت د سولې په تړاو ډير محتاطانه دی، لامل دا دی چې پر طالبانو باور نشته چې له بهرنیو ترهګرو ډلو او بهرنیو هېوادونو سره د جګړې اړیکې پرې کوي او که نه.؟ له همدې کبله ټينګار کیږي چې طالبان دې اوربند وکړي چې وښيي، جګړه یواځې طالبان کوي او که نورې ترهګرې ډلې هم شته.

په دې کې شک نشته چې ټولو ترهګرو ډلو ته په افغانستان کې طالبانو د فعالیت بستر برابر کړی او له ترهګرۍ سره مبارزه کې یې د افغان ځواکونو کار سخت کړی دی.
نو د افغانستان جګړه تر هغه پای ته نه رسېږي، چې طالبان په بهیر کې راګډ نه‌ شي او هغوی و نه ازمایل شي.
که څه هم احتمال شته چې ډېر ژر د امریکا او وسله‌ والو طالبانو ترمنځ د افغانستان د سولې په اړه هوکړه ‌لیک لاسلیک شي، خو افغان د سولې په برخه کې د طالبانو په نیت شک ښکاره کړی.
غني د مونشن امنیتي کنفرانس په څنډه کې یوې غونډې ته د خبرو پر مهال ویلي، طالبان لا هم له افغانستانه بهر په پاکستان کې امن پټنځایونه لري او اړتیا ده چې له پاکستان سره د خپلو اړیکو په اړه وضاحت ورکړي.
د ولسمشر غني د خبرو یو نقل قول په دې اړه داسې دی ((دا د میلیارډونو ډالرو په ارزښت پوښتنه ده، ځکه لومړۍ مسله خو دا ده چې موږ باید طالبان وپېژنو، دا ډله یوه بهر مېشته ډله ده چې په پاکستان کې اوسېږي، د دوی مشرتابه شورا اوس ځان د کوټې او پېښور شوراګانو په نوم یادوي، نه د کندهار، جلال اباد او پکتیا شوراګانو په نوم، دوی خپل نومونه داسې تعریفوي لکه نور قدرتونو چې د دوی ملاتړ کوي. ))
که پاکستان وایي چې د افغان سولې لپاره د همکارۍ په خاطر یې ملا برادر خوشې کړی خو د ملا برادر خوشې کول دا مانا نه لري چې اسلام اباد د افغانستان د سولې له بهیر بشپړ ملاتړ کوي.
که پاکستان همکاري کوي او دوه اړخیزه اړیکې پالي نو یو د طالبانو د پناه ځایونو بندول او دویم د سیمه ییز امنیت لپاره د ګډ تفاهم جوړول پکار دي.
یوازې دا نه ده چې طالبان ځان په رسمیاتو کې له القاعده جلا کړي، بلکې ډېره مهمه ده چې له ټولو ترهګرو شبکو څخه چې د افغانستان هر ګاونډي او نړیوال قدرت ته ګواښ پېښوي لرې شي.
د افغانستان د سولې په تړاو د امریکا او طالبانو ترمنځ د کېدونکې هوکړې متن لا هم رسنیز شوی نه دی خو د تاوتریخوالي کمېدل، له افغانستان د امریکايي عسکرو وتل، د افغانستان له خاورې د نورو هېوادونو پر وړاندې د ترهګریزو کړنو لپاره ګټه نه پورته کول او له افغان حکومت سره د سولې مخامخ خبرو پیل یې مهم موضوعات یاد شوي دي.
د امریکا د دفاع وزیر مارک اسپر له قوله، د تاوتریخوالي د کمېدو پر اووه ورځني وړاندیز د طالبانو او د امریکا د استازو ترمنځ بحثونه شوي دي او اوس باید په افغانستان کې “سولې ته هم یو چانس” ورکړل شي.
سی شنبه ۲۹ دلو ۱۳۹۸ ساعت ۱۵:۰۷
د مطلب کود: 203774 په کلپبورډ کې د خبر متن کاپی
ستاسو نوم

ستاسو دبرېښنا ليک پته
ستاسو نظر *