اروپايي ټولنې اعلان وکړ چې افغانستان د بشري بحرانونو او طبیعي پېښو له اړخه څلورم له خطر سره مخامخ دی.

په کابل کې د جاپان سفارت وايي، دغه هېواد به له اړمنو افغانانو سره د ۱۰۶،۷ میلیونه ډالرو مرسته وکړي. په همدې حال کې د ژمي په رارسېدو سره په افغانستان کې د بشري ناورین له امله ستونزې زیاتې شوي دي.

د ملګرو ملتونو د بشري مرستو د هماهنګۍ دفتر یا (OCHA) د یوه راپور په خپرولو سره ویلي چې په افغانستان کې له تېرو ۱۱ میاشتو راهیسې څه باندې ۱،۱ میلیونه کسانو له نغدي مرستو څخه ګټه پورته کړې او ویلي یې دي چې دې مرستو په افغانستان کې د بشري ناورین مخه نیولې ده.

په قطر کې د اسلامي امارت د سیاسي دفتر مشر سهیل شاهین د یو ټویټ په خپرولو سره پر افغانستان د نړیوالې ټولنې بندیزونو ته اشاره کړې او د نیمګړو پروژو د تمویل په بیا پیلولو کې د ملګرو ملتونو ځنډ د بشري ناورین لامل بولي. دده په وینا؛ عام خلک د نړیوالو بندیزونو اصلي قربانیان دي.