د لوړو زده کړو وزارت سرپرست ندا محمد ندیم د افغانستان په چارو کې د جاپان له ځانګړي استازي کانوشکا ناګاواکا او په کابل کې د دغه هېواد له سفیر تاکاشي اوکادا سره په کتنه کې له دغه وزارت سره د هېواد د پوهنتونونو په جوړولو، ترمیم او تجهیز کې د همکارۍ غوښتنه وکړه.

د اسلامي امارت د لوړو زده کړو وزیر په بلخ ولایت کې د هېواد د شمال زون له دیني عالمانو سره په مشورتي ناسته کې وویل: په پوهنتونونو کې د دیني عالمانو د استخدام لپاره ازموینه نن پیل شوې او دوی کولای شي چې د نورو ترڅنګ خپلې دندې ترسره کړي.

د لوړو زده کړو وزیر په بلخ کې د دولتي او خصوصي پوهنتونونو له استادانو او مسؤلینو سره په کتنه کې وویل، چې په هېواد کې د دیني مدارسو او پوهنتونونو تر منځ توپیر موجود دی او دا اختلافات باید حل شي، څو زده کوونکي او محصلین له یو بل سره نږدې شي.