سره له دې چې په افغانستان کې تر شپږم ټولګي پورې د نجونو د ښوونځیو تړل په ملي او نړیواله کچه جنجال بلل شوی، خو د اسلامي امارت مسؤلین وايي چې د ښوونځیو د بیا پرانستلو لپاره پر یوې مؤثرې او معقولې لارې خبرې روانې دي او دا ستونزه به ژر حل شي.

د اسلامي امارت د پوهنې سرپرست وزیر پرون دوشنبه (اسد ۱۷) په خوست ولایت کې په یوه خبري کنفرانس کې د نجونو د ښوونځیو د تړلو لامل کلتوري محدودیتونه یاد کړل. د هغه په وينا، خلک د خپلو لوڼو په زده کړه کې کومه ستونزه نه لري، خو له کوره يې د وتلو په اړه حساسيت لري.