په کابل کې د پاکستان سفارت شارژدافیر عبیدالرحمن نظاماني د افغانستان د سیمه ییزو همکاریو د نوښت په غونډه کې د سیمه ییز اتصال په برخه کې د افغانستان رول مثبت وباله او ویې ویل چې د سیمې هېوادونه باید په ګډه د افغانستان له حکومت سره خپلو مثبتو اړیکو ته دوام ورکړي.

داسلامي امارت دبهرنیو چارو وزیر امیر خان متقي د شنبې په ورځ (حمل ۲۶) د پاکستان دبهرنیو چارو له وزیر بلاول بوټو زرداري سره ټیلیفوني خبرې وکړې. په دې خبرو کې زرداري د امیر خان متقي له غوښتنې سره موافقه وکړه چې په کابل کې د پاکستان د سفارت شارژدافیر بیرته خپل کار ځای ته وسپاري.

پوځي کارپوهان وايي چې داعش د سیمې او نړۍ د یو شمېر هېوادونو وسیله ده چې په افغانستان کې خپلو سیاسي سیالانو ته زیان رسوي. په دې اساس دغه ډله په منظم ډول هیڅ ډول سیاسي کار نه کوي او وخت په وخت د سیمې او نړۍ د ځینو هیوادونو استخباراتي کړۍ له دغې ډلې څخه د خپلو سیاسي او پوځي موخو لپاره کار اخلي.

داعش ترهګرې ډلې د یوې خبرپاڼې په خپرولو سره په کابل کښې د پاکستان په سفارت د حملې مسئولیت په غاړه واخیست. د دې ډلې په وینا، د داعش دوو غړو د جمعې په ورځ د قوس په ۱۱ مه په کابل کې د پاکستان د سفیر عبیدالرحمن نظاماني د وژلو په هدف د دغه هېواد پر سفارت برید وکړ.

پرون ماسپښین (جمعه، قوس ۱۱) د کابل ښار په کارته پروان سیمه کې د پاکستان سفارت باندي د یوې ودانۍ څخه د نامعلومو وسله والو له خوا ډزي وشوي. دکابل ولايت دامنيې قوماندانۍ دامنيتي ځواکونو دتطبيق په بهير کې ددغې پيښې دڅرنګوالي او ديو شکمن دنيولو خبر ورکړى دى . دې ډزو د پاکستان حکومت منفي غبرګون ښودلی او د دغه برید د جدي پلټنو غوښتنه یې کړې ده.

د بهرنیو چارو وزارت سیاسي مرستیال شیرمحمد عباس ستانکزي په کابل کې د پاکستان د سفارت له شارژدافیر اسد عباس سره په کتنه کې وویل چې د ځینو پاکستاني چارواکو څرګندونې د اسلامي امارت د خپګان او اندېښنو لامل کېږي.