د میدان وردګ ولایت سیمه ییز چارواکي وايي، د دغه ولایت له نشه يي توکو سره د مبارزې ریاست چارواکو په نرخ او جلریز ولسوالیو کې ۴۶ جریبه ځمکه د کوکنارو او چرس له کښت څخه پاکه کړې ده.

د کندز امنیتي چارواکي وايي چې د دغه ولایت په ۹ ولسوالیو کې یې ۵۰ جریبه ځمکه له کوکنارو پاکه کړې ده.

د بغلان امنیتي چارواکي وايي چې د روان کال په اوږدو کې د دغه ولایت کرنیزې ځمکې په بشپړه توګه له کوکنارو پاکې شوې دي.

د سرپل ولايت د امنيې قوماندانۍ وياند په دغه ولايت کې د نشه يي توکو د توليد د دوو فابريکو د نيولو او د ٣٣٠٠ کيلوګرامو نشه يي توکو د نيولو خبر ورکړ او ويې ويل چې ٧٢ جريبه ځمکه هم د کوکنارو له کښت څخه پاکه شوې ده.

د کندهار امنيتي ځواکونو د دغه ولايت د ميوند ولسوالۍ په حاجي خېلو او اکبري سيمو کې د کوکنارو درې جريبه نوي کرل شوي کښت له منځه وړي دي.

د کندهار ولايت امنيتي ځواکونو په ارغنداب ولسوالۍ کې يو جريبه ځمکه کې کرل شوي کوکنار له منځه وړي دي. سیمه ییز چارواکي وايي، د کوکنارو د کښت د بندولو لپاره د اسلامي امارت د رهبرۍ د فرمان له صادرولو وروسته یې په کندهار کې ۶۰۰ جریبه د کوکنارو او چرسو کښت له منځه وړی دی.

د ننګرهار د امنيې قوماندانۍ له نشه يي توکو سره د مبارزې مديريت چارواکي وايي، د دغه ولايت په څوارلسو ولسواليو کې يې ۳۰۰۰ جريبه ځمکه د کوکنارو له کښت څخه پاکه کړې او دغه کار به د دغه ولايت په ۲۲ ولسواليو کې دوام وکړي.

ملګري ملتونه وايي، اسلامي امارت تر اوسه پورې د کوکنارو پر کښت بندیز لګولی، خو د پایلو په اړه یې خوشبیني له وخته مخکې ده.

داسلامي امارت د رئیس الوزرا اقتصادي مرستيال ملا عبدالغني برادر اخند په قلعه ذال کي دغونډي پرمهال وويل چي حکومت په تير يو کال کي په افغانستان کي دکوکنارو دکر او اختلاس مخه نيولې ده .