د کندز ولایت د برښنا ریاست چارواکي وايي چې د روان کال په لومړیو دریو میاشتو کې څه باندې ۲۸۰ میلیونه افغانۍ د دغه ریاست خزانې ته جمع شوي چې د تېر کال په پرتله ۵۰ سلنه زیاتوالی ښيي.

د بلخ د حيرتان د ګمرک مسئولين وايي، چې د روان کال له پيله تر اوسه د دغه ګمرک عوايد نږدې اته ميليارده افغانيو ته رسېدلي، چې د تېر کال په پرتله ۶۰ سلنه زياتوالى ښيي.

په هرات ولایت کې د ملي بسونو د ادارې مشر وايي، په هرات ولایت کې یې د ملي بسونو له فعالیت څخه شاوخوا ۱۲ میلیونه افغانۍ عواید راټول کړي دي.

د فاریاب ولایت د احصایې او اطلاعاتو ریاست چارواکي په دغه ولایت کې د ۲۶ زره کسانو لپاره د برېښنايي تذکرو د وېش د دوو مرکزونو له لارې د برېښنايي تذکرو د خدمتونو د بیا پرانستلو او چمتو کولو اعلان کړی دی.

د بلخ ولايت د ترافيکو مدير وايي: د ١٤٠١ کال له پيل څخه تر اوسه د ښځو او نارينه وو لپاره ٣١٩٩ د موټر چلولو جوازونه صادر شوي او ١٣٨٥ موټرونو ته د موټر چلولو قانوني پلېټونه صادر شوي چې له دې لارې دولت ته څه باندې ٢٢ ميليونه افغانۍ عوايد ترلاسه شوي دي.

د هرات د ښاروالۍ رياست مسوولين وايي، چې په تېر کال کې يې د استوګنې د کورونو، سوداګريزو او صنعتي ځايونو له پاکولو، د بيلونو او اعلاناتو، د ښاروالۍ د ملکيتونو، د ښار په کچه د تشنابونو، د پارکونو د کرايې او پارکينګ له لارې څه باندې څلور سوه ميليونه افغانۍ عوايد راټول کړي دي.

د کانونو او پټرولیم وزارت د تېرې اونۍ په ترڅ کې د دغه وزارت ۲۰۰ میلیونه افغانیو عوایدو ته په اشارې سره او له دغې اندازې څخه د خوښۍ په څرګندولو سره، دا یو بې ساری کار بولي.

د تخار ولایت د مستوفیت ادارې مسؤلین وايي، په تېرو درېیو میاشتو کې یې ۸۲ میلیونه او ۳۳۸ زره افغانۍ عواید راټول کړي دي. د دوی په خبره، سږ کال خلکو له کوم جبر پرته ژر تر ژره خپل مالیه ورکړې ده.