ملا عبدالظاهر صابر د لوګر ولایت اوسېدونکی او د خوست ولایت اوسېدونکی عبدالکریم چې دواړه په ۲۰۰۲ او ۲۰۰۳ کلونو کې د ګوانتانامو زندان ته لېږدول شوي وو او له خوشې کېدو وروسته په عمان کې تر څارنې لاندې وو، د اسلامي امارت د هڅو په پایله کې کابل ته ننوتل. ځینو عربي سرچینو له یوه امریکايي زنداني سره د دغو بندیانو د تبادلې خبر ورکړی دی.

حاجي بشیر نوروزی؛ د ګوانتانامو وروستی بندي او د اسلامی امارت پخوانی مشر ملا محمد عمر ته نږدې کس وویل: چې د «اسلامي امارت» په هڅو له ۱۷ کلن زندانه وروسته خوشې شو. نوموړی زیاتوي، چې افغانستان له څلویښتو کلونو زیات د جنګ او جګړې شاهد دی او وینه تویول پایله نه لري.

باوري سرچینې تاییدوي چې بشر نورزی د ملا محمد عمر ته له نږدې کسانو او د ګوانتانامو وروستی افغان زنداني نن سهار کابل ته راغلی دی. نورزی د هېواد په جنوب کې یو له سترو پیسو تبادله کوونکو څخه و، چې د اسلامي امارت د پخواني واکمنۍ پر مهال یې د اسعارو د تبادلې او راکړې ورکړې لپاره لویه شبکه جوړه کړې وه.