څلور تنه په جوزجان ولايت کې د لرغونو سيمو د ناقانونه کيندلو په تور ونيول شول

افغان غږ خبری آژانس - مزار شریف: د جوزجان ولایت د اطلاعاتو او کلتور رییس مولوی سیف الدین معتصم د دغه ولایت د لرغونو اثارو د غیرقانونی کیندنو په تړاو د څلورو کسانو د نیولو خبر ورکړی.

ده زياته کړه: تيرکال د دغه ولايت په لرغونو او تاريخي سيمو کې د ناقانونه کيندلو په جرم په لسګونو تنه ونيول شول او عامو خلکو ته په مکرر ډول وویل شو چې د لرغونو او تاريخي سيمو له کيندلو څخه دې ډډه وکړي او د سرغړونې په صورت کې به ونیول شي.

هغه زياته کړه، چې د "ایل تیگرمان تپې" لرغونې او تاريخي سيمه د جوزجان ولايت له مرکز شبرغان ښار څخه په ٢١ کيلومترۍ کې موقعيت لري او تر زرو کلونو ډېر لرغونتوب لري.

د يادونې وړ ده، چې د جوزجان ولايت د اطلاعاتو او کلتور رياست د اطلاعاتو او کلتور رياست د معلوماتو پر بنسټ، په دغه ولايت کې شاوخوا ٦١ لرغوني سيمې او تاريخي ځايونه شتون لري، چې له دې جملې څخه ٢٣ يې د دولتي ادارو له خوا ثبت شوي دي.