سفر امامعلی رحمان به اسلام آباد؛ پاکستان و تاجیکستان از صلح و ثبات در افغانستان حمایت می‌کنند

خبرگزاری صدای افغان (آوا) - کابل: منابع رسمی پاکستان امروز پنجشنبه (۲۴ قوس) خبر دادند که امامعلی رحمان، رئیس جمهوری تاجیکستان در جریان سفر رسمی به اسلام‌آباد با شهباز شریف، نخست وزیر پاکستان دیدار کرد.

طبق گفته منابع رسمی پاکستان طرفین در این دیدار پیرامون تقویت همکاری‌های دوجانبه، منطقه‌ای و تعامل نزدیک در مجامع بین المللی از جمله در سازمان همکاری شانگهای، سازمان همکاری اقتصادی و سازمان همکاری اسلامی به توافق رسیدند.

طرفین همچنین از توافق اسلام‌آباد و دوشنبه برای تقویت همکاری‌ها در حوزه مبارزه با تروریسم و کمک به تثبیت امنیت و صلح در افغانستان خبر دادند و تشکیل یک دولت فراگیر در افغانستان را مطالبه کردند.

در جریان سفر رئیس جمهوری تاجیکستان به پاکستان مقام های دو کشور ۸ قرارداد همکاری و یادداشت تفاهم همکاری برای گسترش تعاملات دوجانبه در حوزه تجارت ترانزیت، صنایع و فناوری، مبارزه با قاچاق مواد مخدر، انرژی و گمرکات امضا کردند.

شهباز شریف و امامعلی رحمان طی کنفرانس مطبوعاتی مشترک بر اهمیت تقویت روابط دوجانبه و همفکری برای پیگیری مسائل منطقه‌ای تاکید کردند.

امامعلی رحمان، رئیس جمهوری تاجیکستان، به دعوت شهباز شریف در یک سفر رسمی دو روزه، روز گذشته وارد اسلام‌آباد شد. وی قرار است امروز (پنجشنبه) با "عارف علوی" رئیس جمهور پاکستان دیدار کند.

این در حالی است که سفر رحمان به اسلام‌آباد در راستای نگاه ویژه سیاست خارجی پاکستان به آسیای میانه صورت می گیرد بطوریکه رسانه های پاکستانی از تاجیکستان به عنوان نزدیکترین همسایه پاکستان در آسیای مرکزی نام می برند.