د اندونیزیا حکومت اعلان کړی، چې دغه هېواد به د ملګرو ملتونو د ماشومانو د وجهي صندوق (یونیسف) په همکارۍ افغانستان ته د پولیو ضد واکسین لس میلیونه ډوز ولېږي.

آوا - مانیتورینګ: د اندونیزیا د مالیې وزیر سری مولیاني ویلي، هېواد یې کار کوي چې افغانستان ته دغه اندازه واکسین ورکړي.

د واکسین دغه اندازه باید ۳.۳ میلیونه افغان ماشومان چې عمرونه یې له دریو کلونو کم وي، تر پوښښ لاندې راولي.

د اندونیزیا د مالیې وزیر څرګنده کړه: اندونیزیا تل د همکارۍ روحیه لري، د مختلفو څو اړخیزو او دوه اړخیزو پروګرامونو ملاتړ کوي.

د یادولو وړ ده چې اندونیزیا په نړۍ کې د پولیو د واکسین یو لوی تولیدونکی هیواد دی.

په همدې حال کې د نړیوالو سازمانونو د معلوماتو پر بنسټ افغانستان د نړۍ له هغو دوو وروسته پاتې هېوادونو څخه دی چې پولیو په کې په بشپړه توګه له منځه نه ده تللې./آریانا نیوز