د افغانستان د ټرانسپورټ او هوايي چلن وزارت وايي، هغه هوايي شرکتونه چې په دې هیواد کي بهرنیو ځواکونو ته اکمالات کوي، باید افغان حکومت ته مالیه ورکړي.

تاند - د دې وزارت ویاند ننګیالي کلاتوال نن ازادۍ راډیو ته وویل، چې په دې اړه یې د ناټو له چارواکو سره هم خبرې کړي.

د ده په خبره دا مالیه یوازې د بهرنیو خصوصي شرکتونو لپاره ده او د ناټو پوځي الوتکي له دې مستثنا دي.

د نوموړي په خبره که دغه کار عملي شي، د افغان حکومت خزانې ته به ډیري پیسې ولاړې شي.