یو شمېر کارپوهان وايي چې افغان حکومت باید نړیوالې ټولنې ته دا ثابته کړي چې کورني اختلافات به لمنځه وړي.
دغه کارپوهان تینګار کوي چې ولسمشر او اجرایه رییس باید د ناټو د بهرنیو چارو د وزیرانو او دغه شان د لندن په اقتصادي کنفرانس کې د خپلو ژمنو د عملي کولو په برخه کې څرګند پیغام ولري.
افغان سیاسي، اقتصادي او امنیتي کارپوهان د لندن او بروکسل په غونډو کې د افغان حکومت د مشرانو د ګډون په اړه بیلابیل نظرونه لري.
یو شمېر د چارو شنونکي وايي چې افغان حکومت باید د نړیوالې ټولنې د ملاتړ د راجلبولو لپاره د اساسي اصلاحاتو په برخه کې لازمې تیارۍ ولري.
د سیاسي چارو یو کارپوه جاوید کوهستاني وايي؛ دواړه مشران باید د افغانستان د خلکو اړتیاوو ته په پام سره د بروکسل او لندن په کنفرانس کې واضع پیغام ولري.
ښاغلي کوهستاني د دوشنبې په ورځ ازادۍ راډیو سره په خبرو کې وویل؛ که د اصلاحاتو په اړه طرحه او ژمنو ته صداقت نه وي موجود ستونزمنه به وي چې د نړیوالې ټولنې ملاتړ خپل شي.
"زه هیله من یم چې دواړه مشران به وکولای شي؛ په یوه ابتکار او خلاقیت سره د افغانستان اړتیاوې مشخصې کړي او په دې کانفرانس کې نړۍ ته ښکاره پیغام ورکړي؛ دوی باید ژمنه وکړي چې ډیر ژر به د کابینې تشکیل بشپړوي؛ دوی باید ثابته کړي چې ترمنځ یې د نظرونو اختلاف نشته او د ملي وحدت حکومت نه نقض کیږي؛ له دې سره به نړۍ اعتبار وکړي او په افغانستان کې به پانګونه وکړي."
ولسمشر محمد اشرف غني او اجرایه رییس ډاکټر عبدالله عبدالله د دوشنبې د ورځې په سهار د بروکسل او لندن په غونډو کې د ګدون په هدف له کابل نه وخوځېدل.
د ولسمشرۍ مانۍ په یوې خبر پاڼه کې راغلي دي چې ټاکل شوې دغه لوړ پوړی افغان پلاوی د سه شنبې په ورځ د یو څلور ورځني سفر لپاره لندن ته ولاړ شي.
د اقتصادي چارو یو شمېر کارپوهان په دې باور دي چې افغان حکومت هیڅ یو هغه شرط نه دی پوره کړی؛ کوم چې په تېرو نړیوالو کنفرانسونو کې د عملي کېدلو په اړه یې ژمنې شوې وې.
د چارو یو تن شنونکي تاج محمد اکبر ازادۍ راډیو سره په خبرو کې وویل چې افغانستان سره د مرستو د دوام په اړه د ژمنو تجدید د نړیوالې ټولنې پېرزوینه ده:
"اوس هم جنجالونه شته، افغانستان تراوسه هغو مرستو ته شین څراغ نه دی ښودلی چې د لندن په کانفرانس کې به د افغانانو لپاره اعلانیږي؛ بیا هم زه ټینګار کوم چې نړیوالې ټولنې په ټولو کانفرانسونو کې له سخاوتمندۍ نه کار اخیستی."
د ناټو د بهرنیو چارو د وزیرانو غونډه له دې امله د افغانستان لپاره د اهمیت وړ ګڼل شوې چې له افغانستان څخه د بهرنیو ځواکونو په وتلو سره د ناټو نوی ماموریت او له نړیوالې سره د اړیکو نوې فصل پېلیدونکی دی.
د توکیو په غونډه کې د مالي مرستو د ژمنو په اړه تجدید، د افغان حکومت له لارې د مرستو د لګولو موثریت او د سیمه ییزو همکاریو په برخه د نړیوالې ټولنې زمینه سازي د لندن له کنفرانس څخه د خلکو لویې تمې دي.
خو بل خوا د امنیتي چارو یو شمېر کارپوهان په داشان غونډو کې ګډون دېر کامیابه نه بولي.
د کورنیو چارو وزارت بخوانی وزیر فقیر محمد فقیر په دې اړه وايي:"د نورو کنفرانسونو په شان به ظاهري بڼه ولري؛ فقط د خلکو د غولو لپاره، څو شعارونه او څو قرداردونه، بیا نو عملي بڼه نه لري."
یو شمېر کارپوهان په دې باور دي؛ تر کومه چې افغان حکومت د نوې کابینې د معرفۍ په برخه کې عملي ګامونه نه وي پورته کړي او د نړیوالو مرستو د تر لاسه کولو او مصرفولو ظرفیت پیدا نه کړي؛ ناشونې به وي چې د نړیوالې ټولنې مرستې تر لاسه کړي.