چارواکو په وینا له سې شنبې راهیسې د ډیورنډ کرښې له هاوخوا سیمو څخه تر ۸۰ زیات د توپونو مرمی د کونړ ولایت په دوو ولسوالیو کې لګیدلي دي.
د کونړ ولایت د امنیه قومانداني ویاند فرید الله دهقان وایي، پر ناړی او دانګام ولسوالیو د تازه توپچي بریدونه شوي چې په ترڅ کې یو کور ویجاړ شوی دی.
نوموړی زیاته کړه، چې د تازه توپچي بریدونه ملکي وګړو ته زیان نه دی اوښتې.
د افغانستان ملي دفاع وزارت او په مرکز کې حکومتي چارواکو تر اوسه په دې اړه څه نه دي ویلي.
دا په داسې حال کې ده چې د افغانستان د ملي یووالي حکومت اجرائیه رئیس عبدالله عبدالله د شنبې په ورځ د پاکستان د ملي امنیت سلاکار له ښاغلي ناصر خان جنجوا سره د نورو مسایلو ترڅنګ د پاکستان له لوري د توپچي پر ستونزه هم خبرې وکړې.