نن مسجد اقصی له سختو شېبو سره مخ وو، ۱۳۳۶ تنه افراطي یهودیان له ماسپښين مخکې او وروسته په ډله ييزو ډولونو مسجد اقصی ته ننوتل چې په دې سره پکې د تاوتريخوالې فضا خپره شوه.

له تیرو څو میاشتو راهیسې په لومړي ځل په دومره ستره کچه یهودان د مسجد اقصی ساحې ته ننوتل.

افراطي یهودیانو د مسجد اقصی په منځ کې خپل مذهبي مراسم ادا کړل او په دننه او دروازو کې يې پارونکې کړنې ترسره کړې.

د اسلامي اوقافو ادارې ویلي، افراطي يهودیان د اشغالګرو پولیسو تر کلک امنیتي څار لاندې راغلي وو او د مسجد اقصی په منځ، دروازو او شاوخوا ساحه کې يې پر فلسطینیانو حملې وکړې.

اسرائیلي اشغالګرو پولیسو په همدې مهال ګڼ فلسطينیان د مسجد اقصی په دننه او شاوخوا ساحو کې نيولي دي.

د الجزیرې له راپور سره سم، افراطي یهودیانو د بیت المقدس په زاړه ښار کې پر فلسطیني دوکاندارانو هم بریدونه کړي دي.

د یهودیانو له لورې فلسطينیان مسجد اقصی له ورتګ څخه هم منعه شوي دي.

پر همدې مهال فلسطیني فعالانو او اسلامي او ملي حرکتونو د بیت المقدس پر وګړو غږ کړی چې ځانونه مسجد اقصی ته ورسوي او د افراطي یهودیانو د ورتګ مخه ونیسي.

د اسلامي اوقافو وزارت هم مسجد اقصی ته د یهودیانو ننوتل غندلي او د مسجد اقصی د ساتنې غوښتنه يې کړې ده.

د اوقافو او اسلامي چارو وزير شیخ یوسف ادعیس پر ټولو مسلمانانو غږ کړی چې مسجد اقصی ته د افراطي یهودیانو د ننوتلو پر وړاندې ودريږي او د مسلمانانو د دیني، تاریخي او سیاسي حقونو ساتنه وکړي.

نوموړي پر مسجد اقصی د یهودیانو تېری ډېر خطرناک بللی دی.

د حماس جهادي تنظیم پر ټولو فلسطینیانو غږ کړی چې د مسجد اقصی ملاتړ ته ور پورته شي او په سترو قربانیو سره د یهودیانو له تیري څخه مسجد اقصی وژغوري.

اسلامي جهاد هم مسجد اقصی ته د افراطي یهودیانو ننوتل او هلته د غیرقانوني کړنو ترسره کول خطرناک تېری بللی  او تاکيد يې کړی چې د بیت المقدس او مسجد اقصی په حق کې د اسرائیلي رژيم د جرمونو په اړه چوپ نه شي پاته کېدلی.