هرات ولایت چې له کابل وروسته د کووېډ نولس تر ټولو زیات ناروغان لري، په دغه ښار کې د خلکو له خوا ګرځ بندیز نه عملي کېږي.

په تېرو څو ورځو کې چې په دغه ولایت کې د کووېډ نولس ناروغانو شمېر کم شوی، خلک دومره دغه ناروغي جدي نه ګڼي او په ښار کې ګڼه ګوڼه زیاته شوې ده.
د هرات امنیه قوماندان عبیدالله نورزی په دې اړه وايي:«ځينې وسایط دي چې راستنېدونکي خپلو سیمو ته لېږدوي، ځينو نور وسایط زموږ د سوداګرو دي چې د بې وزلو لپاره خوراکي توکي رسوي.»
خو د هرات ولایت ډېری اوسېدونکي له کورونو د وتلو لامل خپلو کورنیو ته د یوې نمړۍ ډوډۍ پیدا کول بولي.
د هرات اوسېدونکې عزیزه وايي:«د هر څه بیه لوړه شوې. کور کې هېڅ نه لرو. کار مې کاوه او کارونه هم بند شوي دي.»
د هرات بل اوسېدونکې بي بي ګل هم وویل:«نوم یې ولیکه چې ورته خوراکي توکي ورکړي، خو دوه ورځې کېږي چې سرګردانه یم او تراوسه چا راسره مرسته نه ده کړې.»
د هرات د عامې روغتیا رییس خو د هرات د عامې روغتیا ریاست وايي تازه زر د آر اېن اې کېټونه د شکمنو د آزموینو لپاره له کابله دغه ولایت ته لېږل شوي او له دې وروسته به د مثبتو بېلګو شمېر زیات شي.
د هرات د عامې روغتیا رییس عبدالحکیم تمنا وویل:«موجود ظرفیت ۱۴۰ دی چې په ورځ کې ولای شو ټسټ کړو. تر راتلوونکو دوه ورځو، چې د کرنې ریاست لابراتوار ترڅنګ یو بل لابراتوار فعال شي، دغه ظرفیت به ۳۰۰ ته ورسېږي.»
په هرات کې د کورونا ویروس د مثبتو بېلګو شمېر هره ورځ په زیاتېدو دی، خو لیدل کېږي چې په دغه ښار کې قرنطین نه عملي کېږي او دې چارې په نوموړي ښار کې د مثبتو بېلګو د زیاتېدو په اړه اندېښنې زیاتې کړې دي.
 
 تراوسه په هرات کې ۳۹۰ تنه په کووېډ نولس ناروغۍ اخته شوي دي چې له دې ډلې اوه تنه یې مړه شوي دي.