لویه څارنوالي وایي، د ننګرهار ولایت د لعل پورې ولسوالۍ د څارنوالۍ امر یې د ۳۶ زره افغانيو رشوت په تور نیولی.

د لویې څارنوالۍ د مراقبت او کنټرول رئیس نواب احمدزی وایي، د لعل پورې ولسوالۍ د څارنوالۍ امر يې د خلکو د شکایتونو له کبله او دغه راز د ۳۶ زره افغانیو رشوت په تور نیولی.
احمدزی وایي، له دغه څارنوال څخه د یادې ولسوالۍ یوه اوسېدونکي شکایت کړی چې یاد څارنوال ترې د زامنو په قضیه کې رشوت غوښتی.
د یادولو ده چې په دې وروستیو کې لویې څارنوالۍ ګڼ شمېر څارنوالان او د نورو دولتي ادارو کارکوونکي د فساد په تور نیولي.