په هلمند او هرات ولایتونو کې په دوو جلا چاودنو کې لږ تر لږه اوه تنه ولسي ګړي وژل شوي او کابو ۲۰ تنه نور ټپيان شوي دي.

یو له دغو چاودنو نن شنبې (د تلې په ۱۹مه) هلمند کې رامنځته شو چې په هغه کې د دغه ولایت په ګرشک ولسوالۍ کې یو مسافر وړونکی موټر د سړک غاړې پر ماین برابر شو.
د ملي دفاع وزارت د یوې خبرپاڼې پر بنسټ، په دغې چاودنه کې لږ تر لږه پنځه تنه ولسي ګړي وژل شوي او ۹ تنه نور ټپیان شوي دي.
د ملي دفاع وزارت په خبرپاڼه کې همدارنګه راغلی دي چې دغه ماین د طالبانو له خوا ځای پر ځای شوی و.
د هملند په ګرشک ولسوالۍ کې د جمعې پر ماښام یوه بله چاودنه هم شوې او په هرات کې چاودنې ته ورته هغه وه.
د هرات په شینډنډ ولسوالۍ کې د کندهار - هرات لویې لارې په اوږدو کې پر یوه ۴۰۴ ډوله مسافر وړونکی موټر د سړک غاړې ماین چاودنه کړې ده، چې د هغه په پایله کې دوه ولسي وګړي وژل شوي او لس تنه نور ټپیان شوي دي.
د هرات د عامې روغتیا ریاست ویاند محمد رفیق شېرزی وايي، چې د دغې پېښې قربانیان او ټپيان روغتون ته لېږدول شوي دي.
ښاغلي شېرزي همدارنګه زیاته کړه چې د دغې پېښې قربیانان او ټپیان د دغه ولایت حوزوي روغتون ته لېږدول شوي دي او د ټپیانو په منځ کې ماشومان او ښځې هم وې.
د هرات د والي ویاند جیلانی فرهاد هم  وايي چې دغه ماینونه په تازه ګۍ سره د دولت د مخالفو وسله والو له خوا ځای پر ځای شوي یوو
بلخوا طالبانو تراوسه د دغو دوو پېښو په اړه څه نه دي ویلي.
دا په داسې حال کې ده چې په هېواد کې د تاوتریخوالي کچه د زیاتېدو په حال کې ده. ولسمشر غني تېره اوونۍ دوحې ته په خپل سفر کې وویل چې اړتیا ده چې د تاوتریخوالي د کموالي لپاره پر یوه مېکانیزم کار وکړي.