د هېواد په شمال ختيځ کې د کندز امنيتي چارواکي وايي، چې په راتلونکو شپږو مياشتو کې به د کندز د شمال ختيځ زون د پوليسو په اکاډمۍ کې د ملي پوليسو پنځه سوه سرتېري مسلکي، نظامي او ديني زده کړې وکړي.

آوا - مزارشریف: عبیدالله عابدی؛ د کندز د پولیسو ویاند آوا ته وویل: دغه ځواکونه د چهارشنبې په ورځ د اسد په ۱۲مه د کندز ولایت د شمال ختیځ زون د پولیسو روزنیز اکاډمۍ ته د مسلکي او نظامی زده کړو د ترلاسه کولو په موخه شامل شوي دی.
 
د هغه په ​​وينا، دغه ځواکونه د کندز، بغلان، بدخشان او تخار له ولايتونو څخه دي، چې په راتلونکو شپږو مياشتو کې به د تجربه لرونکو او مسلکي ښوونکو له خوا وروزل شي.
 
په همدې حال کې د روان کال د وږي په ١٣مه، د کندوز د پوليسو له اکاډمۍ څخه ٤٥٠ امنيتي سرتېري له شپږ اونيو زده کړو وروسته فارغ شول.