د لوړو زده کړو وزارت سرپرست وزیر ندا محمد ندیم په کابل کې د جاپان له سفیر تاکاشي اوکاتا سره په کتنه کې له توکیو وغوښتل چې له افغانستان سره د تحصیلي او طبي موسسو د ودانیزو پروژو تر څنګ د تجربه لرونکو استادانو د روزنې او د تحصیلي بورسونو د ورکړې په برخه کې همکاري وکړي.

آوا - کابل: د اسلامي امارت د لوړو زده کړو وزارت له خوا نن چهارشنبه د دلوې ۲۶ مه خپره شوې خبرپاڼه کې راغلي، چې د جاپان سفیر هم د علمي اړیکو پر ټینګښت او د علمي او کلتوري همکاریو په اړه خبرې وکړې او د دواړو هېوادونو ترمنځ د څېړنو پر تجربو ټینګار وشو.
 
تاکاشي اوکاتا همداراز یادونه وکړه چې جاپان د افغانستان د خلکو تر څنګ ولاړ دی او خپلو بشري مرستو ته به دوام ورکړي.
 
د لوړو زده کړو وزارت سرپرست هم ډاډ ورکړ چې کابل له نړیوالې ټولنې سره ښو اړیکو ته ژمن دی او غواړي چې له جاپان سره دغو اړیکو ته دوام ورکړي.