آوا – مزارشریف: د سمنګان د اطلاعاتو او کلتور ریاست د کلتوري میراثونو او تاریخي ابداتو د ساتنې رئیس محمد امین عزیزي نن پنجشنبه (کب ۴) آوا ته وویل: په سمنګان کې ۹۱ تاریخي ابدات شتون لری، خو زیاتره یې له ویجاړۍ سره مخ دي او شاوخوا یې د زورواکو له خوا غصب شوي دي.

 

د هغه په ​​وينا، د وخت په تېرېدو، بارانونو او د تېرو حکومتونو نه پاملرنه د سمنګان لرغوني آثار د ويجاړېدو له ګواښ سره مخ کړي دي.

 

هغه زياته کړه، چې د حضرت سلطان ولسوالۍ هزار سماج کوکجر د دغه ولايت تر ټولو لرغونى تاريخي حوض دى، چې څلوېښت زره کاله پخوا تاريخ لري.

 

عزيزي دغه راز وويل، چې د دې ولايت د هزار سماج کوکجر، تخت رستم، لنګر کلا او يو شمېر نورو تاريخي آبداتو په شاوخوا کې له تېرو کلونو راهيسې د ځمکو غاصبينو ځمکې غصب کړې او په کې د استوګنې کورونه جوړ شوي، چې د اطلاعاتو او کلتور رياست يې په اړه پلټنې کوي.

 

د هغه په ​​وينا، د اسلامي امارت د واکمنۍ له پيله په سمنګانو ولايت کې د لرغونو اثارو د غصب او کيندنې مخه نيول شوې، خو لا هم د دغو سيمو د ساتنې لپاره د امنيتي ځواکونو ګمارنې ته اړتيا ده.