آوا - د پاکستان څخه اتیا سلنه ایستل شوی افغانان د استوګنې معتبر اسناد لري

د پاکستان څخه اتیا سلنه ایستل شوی افغانان د استوګنې معتبر اسناد لري

له پاکستان څخه د افغان کډوالو د جبري ایستلو له بهیر وروسته، د دغه هیواد ځینو رسنیو اعلان وکړ، چې له پاکستان څخه د افغانستان پولې ته د ایستل شوي ۸۰ سلنه افغانان د اوسیدو معتبر اسناد لري.

آوا - کابل: پاکستانۍ ورځپاڼې "ډان نیوز" اعلان کړی چې له پاکستان څخه د اخراج لپاره ترانزیتي مرکزونو ته استول شوي تر ۸۰ سلنې زیات د هویت اسناد لري.

د دې خپرونې له مخې، ډېری افغان کډوال نه غواړي چې په خپله خوښه خپل هېواد ته ستانه شي.

دې خپرونې د سرچینو په حواله ویلي، چې په ځینو مواردو کې پاکستاني چارواکي د افغانانو اعتباري کارتونه ضبطوي او بیا یې د اخراج لپاره ترانزیتي مرکزونو ته لېږدوي.

د پاکستاني چارواکو په وینا، په دغه هېواد کې د مېشتو افغان اتباعو د اخراج په لومړي پړاو کې به یوازې هغه افغانان چې په بشپړ ډول له اسنادو پرته ژوند کوی بېرته خپل هېواد ته استوي.

په همدې حال کې له پاکستان څخه د افغان کډوالو د جبري ایستلو بهیر له کورنیو او نړیوالو غبرګونونو سره مخ شوی دی.