د بغلان ولایت د کلیو پراختیا ریاست مسوولین وايي، سږ کال د دغه ولایت په شپږو ولسوالیو کې ۵۵۰ کیلومتره کلیوالي سړکونه د ۱۹۶ پروژو په چوکاټ کې رغول شوي دي.

آوا - کابل: په بغلان کې د اسلامي امارت د کلیو پراختیا ریاست چارواکي وايي، چې سږ کال یې د دغه ولایت په شپږو ولسوالیو کې د ۱۹۶ پروژو په چوکاټ کې ۵۵۰ کیلومتره کلیوالي سړکونه رغولي دي.
 
د باختر آژانس د رپوټ له مخې دغه سړکونه د نړيوال بانک په مالي مرسته ترميم شوي دي او څه دپاسه ٣.٢٧ زره سيمه ييز اوسيدونکي به ترې مستقيم ګټه پورته کړي.
 
سیمه ییز چارواکي هم د لوګر ولایت د مرکز اړوند د بادام پل په شیلک سیمه کې د اوبو د یوې ذخیرې د جوړېدو خبر ورکوي او وايي، چې دغه زېرمه به د نړیوال خوراکي پروګرام په مالي مرسته د ۹ میاشتو په موده کې ۵۰ متره اوږدوالی او ۳ متره لوړوالی ولري.
 
د اوبو دغه زیرمه د ۱۳۰۰ متر مکعب اوبو د ذخیره کولو ظرفیت لري.