په افغانستان کې جوړ شوی لنډ هنري فلم چاپ انداز هلکان، چې په نړیوالو کچه یې د ګڼو خلکو پاملرنه ځان ته واړوله، پرون د اسکار جایزې ته کاندید شو.
چاپ انداز هلکان د افغان فلم پروژې په نوم د غیرانتفاعي موسسې له خوا جوړ شوی. دا دېرش دقیقې فلم د مستندو فلمونو جوړوونکي امریکایي سم فرېنچ Sam French چې د افغان فلم پروژې موسسه هم تمویلوي جوړ کړی.
په دې فلم کې، چې شوټنګ یې د ۲۰۱۱ کال په ژمي کې په کابل کې اولس ورځې دوام وکړ فواد محمدي، ولي تلاش او جوانمردپاییز مرکزي رولونه لوبولي.
فرېنچ وايي، د دې فلم ډېره برخه لګښت له هغو ۲۰۰ زره ډالرو څخه تمویل شو چې د متحدوایالاتو د بهرنیو چارو وزارت د ده کمپنۍ ته ورکړل.
نړېوالو وروسته له دې چې چاپ انداز هلکان په متحدوایالاتو، اروپا او اسیايي هېوادونو کې په نړیوالو فستیوالونو کې نندارې ته وړاندې شو، د سم فرېنچ کار ډېر وستایه.
فرېنچ تېر کال د دې فلم په خاطر د لاس انجلس د لنډو فلمونو د فستیوال جایزه وګټله او پرون د جنوري په لسمه د لنډو فلمونو په کتګورۍ کې اوسکار جایزې ته کاندید شو.
دریافت صفحه با کد QR