په هلمند ولایت کې په یوې ځانوژونکې حمله کې یو پولیس ووژل شو او بل ټپي شو. 
د هلمند د امنیې قومندانۍ ویاند احمد فواد عسکري ازادي راډیو ته وویل؛ دا حمله تېره شپه د مارجې په ولسوالۍ کې په یوې پوستې وشوه.

د یو بل خبر له مخې: د کونړ چارواکي وايي، په چپې درې ولسوالۍ کې د هاوان یوه مرمرۍ لګیدلې چې پنځه تنه یې ټپيان کړي دي.
د کونړ امنیه قومندان ازادي راډیو ته وویل؛ پېښه پرون شپه شوې او په ټپیانو کې درې پولیس هم شامل دي.
ښاغلي سیدخیل وویل، د افغان ځواکونو په ځوابي ډزو کې یو تن وسله وال مخالف وژل شوی او یو بل یې ټپي دی.
وسله والو طالبانو تر اوسه د دغو دواړو پیښو په اړه څه نه دي ویلي.