افغان حکومت او ملګرو ملتونو له مرسته کوونکو هېوادونو وغوښتل؛ څو د ۲۰۱۴ م کال د طبیعي پیښو په خاطر افغانستان سره څلور سوه شپږ میلونه ډالره مرسته وکړي.
د افغانستان د کلیود پراختیا او بیارغاونې وزیر او له طبیعي پیښو سره د مبارزې د کمیټې مرستیال ویس برمک نن خبریالانو ته وویل چې؛ دغه پيسې به په څلورو برخو کې ولګول شي.
"دا پیسې چې سږکال له نړیوالې ټولنې غواړو د روغتیا، غیر خوراکي توکو، بيځایه شویو کډوالو په برخه کې به ولګول شي."
ویس برمک هیله څرګنده کړه چې؛ راتلونکې کال به د افغانستان لپاره یو ښه کال وي.