خبرگزاری صدای افغان (آوا) - کابل: دفتر مطبوعاتی وزارت تحصیلات عالی امارت اسلامی با نشر توییتی گفته است که مولوی ندا محمد ندیم، سرپرست این وزارت و هیئت همراه در نشست وزیران معارف و تحصیلات عالی در شهر کازان جمهوری تاتارستان اشتراک کرده است.
به گفته وزارت تحصیلات عالی امارت اسلامی، ندامحمد ندیم، در این نشست درباره همکاریهای علمی مشترک، تبادل تجربیات علمی، بهره مندی از تخصص یکدیگر و تبادل بورسیه های دولتی در بخش های مختلف بحث و تبادل نظر کرده است.
براساس معلومات وزارت تحصیلات عالی، ندامحمد ندیم در حاشیه نشست وزیران معارف و تحصیلات عالی تاتارستان، دیدار ویژهای با وزرای معارف و تحصیلات عالی تاجیکستان، ازبکستان و ترکمنستان در مورد موضوعات آموزشی داشته است.
ندامحمد ندیم، سرپرست وزارت تحصیلات عالی امارت اسلامی هفته گذشته روز (سهشنبه، ۱۶ جوزا) با هئیتی بلند پایه از این وزارت به دعوت رسمی جمهوری تاتارستان روسیه راهی این کشور شد.
سخنگوی وزارت تحصیلات عالی هدف سفر ندامحمد ندیم و هیأت همراهش را اشتراک در نشست وزیران معارف و تحصیلات عالی تاتارستان عنوان کرده است.
بهگفته او، ندیم همچنین در کنار بازدید از دانشگاههای مختلف در مسکو و شماری دیگر از شهرهای روسیه، با دانشجویان اهل افغانستان مقیم روسیه نیز دیدار میکند تا از آنها در مورد مشکلاتشان بشنود.