د افغان او پاکستاني چارواکو ترمنځ د تورخم دروازې د پرانستلو په اړه ناستې او د خبرو دوام

افغان غږ خبری آژانس: په داسې حال کې چې د تورخم دروازه د پرله پسې شپږمې ورځې لپاره تړلې ده، پاکستاني رسنیو نن دوشنبه (۲۰ سنبله) د رسمي سرچینو په حواله خبر ورکړی چې افغان او پاکستاني چارواکو د تورخم په صفري نقطه کې سره لیدلي دي، د تاو تریخوالي د حل او د پولې د بیا پرانستلو په اړه خبرې شوي دي.
 
یوې سرچینې چې نومونه یې نه دي په ډاګه شوي، "ډي نیوز" رسنیو ته ویلي چې د افغان پلاوي مشري د افغانستان د ګمرک رییس حافظ عصمت الله یعقوبي، قاري معراج او مولوي تکل کوي.
 
سرچينې زياته کړې، چې دواړو لورو هوکړه کړې، چې خپلمنځي اختلافات به د خبرو اترو او خبرو اترو له لارې حل کوي.
 
په دغه کتنه کې د اسلامي امارت چارواکو وویل چې د پاکستاني ځواکونو له خوا ډزې هغه مهال وشوې چې افغان سرحدي ځواکونه په افغانستان کې د نوې امنیتي پوستې د جوړولو او د زړو امنیتي پوستو د ترمیم په حال کې وو.
 
سرچینه دا هم وايي، چې د اسلامي امارت پلاوي پاکستاني چارواکو ته ډاډ ورکړی، چې تر جوړېدو وروسته به نوې امنیتي پوسته د پاکستان پر ضد ونه کارول شي.
 
پاکستاني لوري د اسلامي امارت چارواکو ته ویلي، چې زړې امنیتي پوستې دې جوړې کړي، خو نړیوال قوانین په سلو مترۍ کې د نویو امنیتي پوستو د جوړولو اجازه نه ورکوي.
 
پاکستاني چارواکو د اسلامي امارت چارواکو ته ویلي، چې د صفري نقطې ته څېرمه د نویو امنیتي پوستو له جوړولو مخکې دې پاکستان ته خبر ورکړي.
 
په همدې حال کې سرچینو ویلي چې د اسلامي امارت چارواکو له پاکستاني چارواکو غوښتي چې د تورخم لاره دې پرانیزي ځکه چې تازه بار شوي مېوې او سبزیجات د ګرمې هوا له امله په خرابېدو پیل شوي دي.
 
پاکستاني لوري د اسلامي امارت چارواکو ته ویلي، چې د تورخم دروازه به د دغه هېواد د لوړ پوړو چارواکو له حکم وروسته بېرته پرانستل شي.
 
د يادونې وړ ده، چې د تورخم دروازه د تېرې چهارشنبې په ورځ د افغان او پاکستاني امنيتي ځواکونو تر نښتې وروسته وتړل شوه، چې وروسته پاکستان د تورخم دروازه د تړلو پرېکړه وکړه.