دخپریدو نیټه :سه شنبه ۱۹ سرطان ۱۴۰۳ ساعت ۱۳:۵۵
د مطلب کود : 293255
اسلامي امارت تمه لري چې د افغانستان پر بانکي سیسټم محدودیتونه لرې شي
‏د رئیس الوزرا سیاسي مرستیال مولوي عبدالکبیر، په کابل کې د جاپان له سفیر تاکایوشي کورومیا سره وکتل.
افغان غږ خبری آژانس: په دې کتنه کې د جاپان سفیر د دوحې ناسته مهمه بللې او ويلي يې دي، چې د اسلامي امارت ګډون او د دوه اړخیزو ناستو دوام تعامل ته ښه زمینه برابره کړې ده.

‏هغه خصوصي سکتور ته د آسانتياوو برابرولو او له نشه يي توکو سره د مبارزې په برخو کې د اسلامي امارت هڅې ستایلې او زیاته کړې يې ده چې جاپان له نشه يي توکو سره د اسلامي امارت قاطع مبارزې ته په کتو، په افغانستان کې د بدیل معيشت لپاره لس میلیونه ډالره ځانګړي کړي دي.

‏د جاپان سفیر، له افغانستان سره د خپل هېواد د مرستو پر دوام ټينګار کړی او څرګنده کړې يې ده، چې هېواد یې په افغانستان کې د خصوصي سکټور د پیاوړتیا لپاره اساسي پروژې پلي کړي او په دې برخه کې به یې همکاري دوام ومومي.

‏د رئیس الوزرا سیاسي مرستیال هم په خپلو خبرو کې، له افغانانو سره د جاپان له مرستو څخه د مننې ترڅنګ؛ هیله ښودلې چې د دوحې ناستې ګډونوال د نشه يي توکو د بدیل پروګرامونو او د خصوصي سکټور د پیاوړتیا لپاره له افغانستان سره خپلې ژمنې عملي کړي.

‏سياسي مرستيال د دوحې درېیمه ناسته بریالۍ او مهمه یاده کړې او ویلي یې دي چې په دې ناسته کې ملګرو ملتو سازمان د افغانستان شرایط او وړاندیزونه منلي او اسلامي امارت توقع لري، چې د افغانستان پر بانکي سیستم شته محدودیتونه لرې شي.

‏هغه دغه راز ټینګار کړی چې اسلامي امارت له ټولو هېوادونو سره تعامل او د اړیکو پراختیا غواړي او هېچاته ته به اجازه ور نه کړي چې د افغانستان له خاورې څخه د چا پر ضد استفاده وکړي./باختر
 
https://avapress.com/vdcbsfb5srhb95p.q3ur.html
تبصره پوسټ کړئ
ستاسو نوم
ستاسو دبرېښنا ليک پته